काठमाडौं, वैशाख २० – एमाले बरिष्ठ नेता केपी शर्मा ओलीले माओवादीको सडक आन्दोलनबाट सरकार नढल्ने दाबी गरेका छन् । ‘चार हजार केटाकेटी सडकमा उफार्दैमा संवैधानिक बाटोबाट बनेको सरकार ढल्दैन,’ बालुवाटारमा रिपोर्टर्स क्लवले गरेको साक्षात्कारमा सोमबार उनले भने, ‘सरकार ढाल्न संवैधानिक र विधिसम्मत् बाटोमा माओवादी आउनुपर्छ ।’
संवैधानिक बाटोमा आएको माओवादीले सडकबाटै सरकार ढाल्ने योजना बनाउनु अनौठो भएको ओलीले बताए । ‘समस्या समाधानका लागि संसद छ, संविधानसभा छ, यहींबाट उपाय खोज्नुपर्छ,’ उनले भने, ‘सत्ता कब्जा गर्छु भनेर ताउरमाउर गरेर पाइन्न । जनताले दुःख मात्र पाउँछन् ।’
आन्दोलनको सहभागिता घट्दो
ओलीले माओवादीले आइतबारदेखि सुरु गरेको अनिश्चितकालीन आमहड्तालमा सहभागी हुनेहरु घट्दै गएको बताए । ‘आन्दोलनमा घट्दै जानु अनौठो होइन, अस्तिका दिनको रौनक हेरौं, हिजोको हेरौं, प्यारामिटर निकै तल छ, झन् आज त निकै तलै झरेको छ ।’
ओलीले माओवादीले जारी आन्दोलनलाई फिर्ता लिएर सहमतिमा आए जुनसुकै बिषयमा छलफल गर्न सकिने बताए । ‘सहमपतिपछि राष्ट्रिय सहमतिको सरकार बनाउन सकिन्छ,’ उनले भने, ‘माओवादीले आफ्नो काँधमा आएको अभिभारा बुझ्न जरुरी छ । सरकार परिवर्तनको कुरा निरर्थक हो ।’ उनले चितवन र पोखरामा केही अप्रिय अवस्था आए जस्तो भएपनि माओवादीको हड्ताल शान्तिपूर्ण भएकोमा प्रशंसा गरे ।
बिरामीलाई घर पठाऊ
एमाले नेता ओलीले माओवादी आन्दोलनमा आएर बिरामी भएकालाई अबिलम्ब घर पठाऊन सरकारलाई आग्रह गरेका छन् । ‘आन्दोलनमा आएकाहरु धमाधम बिरामी भएर अस्पताल गइरहेका छन् । एकजनालाई प्रधानमन्त्री बनाउन जनतालाई दुःख दिनु हुन्न,’ उनले भने, ‘म सरकारसँग माग गर्छु, बस-ट्रकको व्यवस्था गरेर उनीहरुलाई अबिलम्ब घर पठाउनुपर्छ ।’
बामदेवलाई कारवाही
एमाले बरिष्ठ नेता ओलीले प्रधानमन्त्रीको राजिनामा माग्ने पार्टी उपाध्यक्ष बामदेव गौतमलाई कारवाही गर्ने बताए । तर, राजिनामा माग्ने ६० मध्ये अधिकांश नेता तथा सभासदहरुले त्यसको खण्डन गरिसकेको उनले जिकिर गरे । ‘हावामा फुल पारेको हो कि कसैले फुल पारेका हुन् । जो सुकैले फुल पारे पनि यो एमालेको धारणा र नीति बिपरीत छ,’ उनले भने, ‘ अनुशासन, अराजक किसिमले यस प्रकारका आपत्तिजनक र हानिकारक काम गर्नेलाई कारवाही हुन्छ, कारवाही गर्नैपर्छ ।’
पार्टी नीतिबिपरीत काम गर्नेलाई कारवाही नगरे पार्टीलाई अप्ठ्यारो पर्ने ओलीको भनाइ छ । ‘यो पार्टीका दुई लाख संगठीत सदस्य मध्ये २ जनाको भावना पनि समेट्दैन,’ उनले भने ।
प्रधानमन्त्रीले राजिनामा दिंदैनन्
ओलीले प्रधानमन्त्री माधवकुमार नेपालले राजिनामा नदिने अडान दोहोर्याउँदै आफूले पनि त्यस्तै सल्लाह दिएको बताए । ‘मैले मात्र सल्लाह दिएको होइन, २२ दलले पनि अहिलेसम्म राजिनामा दिनु हुँदैन भनेका छन्,’ उनले भने । ओलीले एमालेले पनि प्रधानमन्त्रीलाई राजिनामा दिन नभनेको बताए ।
(कान्तिपुर )